Kisa blanchiman dantè a ye?

Blanchiman se teknik ke yo itilize nan medsin dantè pou amelyore koulè dan moun ki swete gen dan blanch.

Yo fè sa pi souvan pou moun ki gen dan  jòn ,ak moun ki vle amelyore aparans yo pou yo parèt pi bèl.

Fòk mwen di nou ke nòmalman moun pa fèt ak dan blanch, men dan yo pa fèt pou yo twò jòn tou, se nan sans sa, si yon moun estime ke li pa renmen koulè dan l yo, li kapab al wè yon dantis pou l mande fè blanchiman.

Gen 2 fason yo blanchi dan:

Premye fason an se lè moun nan al kay dantis pou l fè blanchiman an, lè sa dantis lan ap itilize yon jèl ki gen yon pwodwi ladan ke yo rele  « Peroxyde d’hydrogène » pou l pase sou dan yo, e apresa li ka pwojte yon limyè sou dan yo pou blanchiman an ka fet rapid, oubyen tou li ka fè sa nan plizyè randevou jiskaske moun nan jwenn koulè dan li vle a.Men sa konn rive dèfwa dantis lan bay moun nan tretman an pou l al kontinye l lakay li. 

Blanchiman sa dirab, Dan yo ka rete blanch pou yon bon ti tan ,tou depan de teknik dantis lan itilize a. Men avan blanchiman an, moun man dwè fè pwofilaksi, tretman kari ak tout lot pwoblem li ta gen nan bouch li.

Dezyèm fason yon moun ka blanchi dan l, se lè moun nan chwazi achte pèsonelman pwodwi blanchisan yo poul fè sa poukont li lakay li, pami pwodwi sa yo gen pat dantifris, jèl , ak bandlèt yo vann ke moun nan ka kole sou dan l pou l blanchi yo. Men atansyon, si yon  moun chwazi fè blanchiman poukòl Li dwe pran anpil prekosyon , nan sans sa li toujou preferab pouw wè yon dantis avan pou l ka gad bouch ou, fè pwofilaksi pou ou, fè tretman tout pwoblem ou te gen nan bouch ou avan epi baw bon jan eksplikasyon sou produit blanchiman ou achte a pouw konn kòman pouw bien itilize l. Youn nan dezavantaj ki genyen lè yon moun blanchi dan l lakay li se paske blanchiman sa pa dire anpil, men kòm avantaj li koute mwens kòb epi li pèmèt moun nan jere yon aparans byen rapid men li pa dirab menm jan ak blanchiman dantis yo fè a. Blanchiman dantis yo dire pi lontan.

Èske blanchiman dantè a pa gen lòt konsekans ?

Konsekans ki ka genyen se lè moun nan fè blanchiman an san kontwòl , lè moun nan itilize pwodwi yo an eksè ak lè blanchiman an fèt nan move kondisyon. se poutèt sa li rekòmande pou nou toujou jwenn avi yon dantis sou kesyon blanchiman an. Paske siw al blanchi dan w san kontwòl ou ka lakoz Dan yo vin sansib, frajil, e menm fasil pou kase.

Yon moun Ki fin fè blanchiman dwe evite konsome kek bagay sil vle konsève dan blanch yo, Li dwe Evite fimen, evite bwè twop te ak kafe, evite konsome bagay ki ka kolore dan yo.

Siw swete blanchi dan w, vizite yon dantis avan w ta itilize yon produit pouw ka gen tout enfòmasyon ki nesesè sou fason pouw itilize l epi fè tout travay ki merite fèt nan bouch ou avan blanchiman an. Siw vle yon blanchiman ki dirab, Li preferab pouw fèl kay dantis ki spesyalis pou sa. Men Siw vle jere aparans ou pou yon gwo okazyon rapid, ou kapab toujou itilize produit yo vann pou sa paske li koute mwens kòb, men fòk ou ou fè sa an akò ak yon dantis ki pou konseye w sou sa.

Si tèks sa te itil ou, pa bliye pataje l ak tout moun sou paj ou.

Siw ta renmen li pwochen tèks la, al abone ak paj @bazard_dentist/prixdent sou lyen sa👇

https://www.facebook.com/docteurbazard/

Swiv nou sou Instagram tou sou lyen sa 👇

https://instagram.com/bazard_dentist?r=nametag

5 konsèy ou dwe aplike pouw evite gen movèz alèn

Men 5 konsèy ou dwe aplike pouw evite gen movèz alèn :🗣😷

Movèz alèn se yon pwoblèm ki touche anpil moun nan sosyete a, majorité moun ki soufri movèz alèn ap remake bouch yo bay movèz odè lè yap pale ak lè yap respire, oubyen yo ka santi bouch yo gen move gou trè souvan. Men anpil fwa moun ki gen movèz alèn lan pa toujou konsyan de sa , lè konsa se yon moun pwòch li sèlman ki ka fè l konprann sa. Plis moun ki soufri Movèz Alèn se akoz yon mank ijyèn nan bouch yo oubyen yon pwoblèm dijestif (estomac).

Sikològ yo montre ke movèz alèn se yon pwoblem ki ka fè anpil enpak sikolojik sou yon moun, Li diminye sou kapasite moun nan genyen pou l apwoche lòt moun ki nan antouraj li.

Se poutèt sa jodia , nap prezantew 5 konsèy medikal pouw toujou aplike siw vle evite gen pwoblèm movèz alèn.

1️⃣-Toujou netwaye lang nou lè n fin bwose dan nou.

▪️Anpil nan bakteri ki lakoz movèz alèn yo se bakteri anaerobi, savledi mikwob ki renmen imidite(kote ki mouye), lang nou se youn nan pati ki pi imid nan bouch la , se pou sa bakteri yo renmen rete sou lang nou pou yo dekonpoze epi degaje move sant pou bay pwoblem movèz alèn nan. Pou n evite bakteri sa yo miltiplye , Nou dwe toujou netwaye lang nou . Pou n fè sa, nou ka itilize yon « Grat Lang » ke yo vann nan famasi ,dèfwa gen bwòs dan ki tou gen Grat lang yo, osinon si bwòs la pa genyen l wap jis itilize pay bwòs la pouw netwaye lang ou lejèman aprè w fin bwose dan yo.

2️⃣-Evite konsome twòp Lay ak Zonyon nan manje nou.

▪️Lay ak Zonyon gen yon konpoze ladan yo ke yo rele « dérivé sulfuré » . Lè nou konsome anpil lay ak zonyon , “dérivé sulfuré” sa yo pase direkteman nan san nou pou yo elimine a travè pipi nou,swè kò nou, ak nan poumon nou. Konpoze sa yo pran anpil tan pou yo dégradé nèt nan kò nou, se sak fè nou ka remake  yon movèz alèn ki dire anpil aprè nou fin konsome anpil lay ak zonyon, paske dérivé sulfuré yo prezan nan l’air ke nou rejte a. Pou nou anpeche sa rive, nou dwe kontwole kantite Lay ak Zonyon nap konsome nan alimantasyon nou chak jou.

3️⃣-Bwose dan nou regilyèman epi itilize fil dantè.

▪️Chak lè nou fin manje ,toujou genyen kras ki rete sou dan nou, se sak fè li rekòmande pou nou toujou bwose dan nou chak lè nou fin manje(sitou le matin e le swa), lè nou pote neglijans nou pa bwose bouch nou regilyèman, gen yon kouch kalkè byen di ke yo rele « tartre » ki ap parèt sou dan yo,kouch kalkè sa fasilite mikwòb ki bay movèz alèn yo miltiplye. Anplis de sa,kras manje yo renmen al kache nan fant dan nou, lè sa li pi difisil pou yo sòti epi yo dekonpoze pi vit pou degaje movèz odè. Pou nou evite sa rive nou, li rekòmande pou nou toujou byen bwose dan nou chak matin chak swa avan nal kouche epi itilize fil dantè pou nou netwaye fant dan yo.

4️⃣-Toujou byen idrate kò nou pou n evite bouch nou sèch.

▪️Li rekòmande pou nou bwè an mwayèn yon lit edmi dlo nan yon jounen. Lè nou pa bwè ase dlo pandan jounen an bouch nou konn gen tandans sèch. Fòk nou pa bliye ke krache nan bouch nou jwe yon wòl antibaktebyen tou, li gen kapasite poul afebli mikwòb yo epi patisipe nan metwayaj bouch la otomatikam. Lè bouch nou sèch, sa anpeche kras manje yo elimine rapidman e sa favorize bakteri ki nan bouch nou yo dekonpoze pi rapid. 

Kidonk, nou dwe toujou bwè anpil dlo,epi evite move abitid ki ka rann bouch nou sèch yo.

5️⃣-Vizite dantis nou pou piti yon fwa chak ane.

▪️Chak lè nou vizite dantis nou, sa ban nou possibilité pou nou jwenn bon jan enfòmasyon sou eta santé bouch nou.

Anpil nan mikwòb ki koz movèz alèn yo renmen al kache anba jansiv la oubyen sou dan yo dirèkteman, se pousa nou dwe fè pwofilaksi chak 6 mwa pou fè bon netwayaj anba jansiv nou epi pou retire tout depo kalkè (tartre) ki te di sou dan yo. Aprè pwofilaksi, dantis la kapab preskri w pat dantifris ak bain de bouche ki approprié pou rezoud pwoblem ou an.

Vizite dantis nou regilyèman, se meyè mwayen pou n kontwole eta santé bouch nou epi fè prevansyon pou evite devlope tout kalite maladi nan bouch nou tankou movèz Alèn.

Pa janm bliye, meyè fason pou nou kenbe bouch nou an santé se lè nou respekte règ ijyèn yo. Pa neglije swiv 5 konsèy sa yo pouw fè prevansyon kont movèz alèn.

Si tèks sa te itil ou, pa bliye pataje l ak tout moun sou paj ou.

Siw ta renmen li pwochen tèks la, al abone ak paj @bazard_dentist lan sou lyen sa👇

https://www.facebook.com/DrBazard/

Rete konekte ak nou sou Facebook ak Instagram @bazard_dentist.

Pa bliye prensip pou n konbat kowonaviris la, toujou lave men nou, touselle nan koud nou, mete mask epi kenbe distans ou ak lòt moun.