Dekolorasyon dan devan aprè frakti

Gen anpil rezon Ki ka lakoz dan devan yon moun chanje koulè, men youn nan rezon ki pi frekan ki ka lakoz sa rive : se lè yon moun nan te frape sou dan an, epi aprè kèk tan li vin remake dan an ap chanje aparans.

Anpil moun ki gen pwoblem sa, dèfwa yo pa gen enfòmasyon sou kijan yo ka rezoud li pou pèmèt dan an repran koulè nòmal li, nan tèks sa nou pral baw plis ekzplikasyon sou kisa ki lakoz fenomèn sa e ki tretman ki genyen pou rezoud li.

Nòmalman Dan an gen plizyè pati ladanl, gen divès kouch pwoteksyon ki la pou pwoteje li tankou “Email , Dentine “ men gen yon pati nan dan an ki pwofon anpil, se pati enteryè dan an, yo rele li “Pulpe Dentaire”. Se atravè pati sa ke nou rele Pulpe lan ke SANG rive sikile nòmalman nan Dan an ( nou ka sezi paske se pa nou tout ki te konnen ke dan an gen SANG kap sikile ladanl menm jan ak lòt ògan nan kò  nou).Pati sa ki rele Pulpe lan frajil anpil paske se li ki pèmèt dan an gen sensibilité.

Kisa ki ka pase lè dan nou frape?

Pa egzanp si yon moun ta pran yon chòk sou dan li pandan yon aksidan, pandan lap batay oubyen pandan lap jwe foutbòl , epi DAN an pata rive sipòte chòk la, lè sa Pulpe lan kapab touche, dan an kapab kase e sa pral lakoz ke veso ki pote SANG nan DAN an gendwa dechire,e sa pral pèmèt SANG an kaye nan dan an apre kelke tan.
Se konsa dan sa gendwa vin chanje koulè akoz san an ki kaye ladanl la,sa ka fè dan an vin bay yon koulè mawon, yon koulè gri oubyen jòn fonse.
Fòk mwen di nou ke sa rive pi souvan lè timoun yo piti nan fè move jwet paske li pi fasil pou yo tonbe sou dan yo, epi yo tou grandi ak yon ti grenn Dan koulè mawon devan bouch yo.

Ki konsekans sa genyen?
Premye konsekans sa genyen : moun nan  pèdi chèlbè l ,e sa diminye nan estim li,Li paka souri menm jan ankò.

Lòt konsekans, sa ka bay moun nan Kis oubyen Absè, jansiv ki nan zòn dan an ka vin anfle, jansiv la ka fè pij.

Anpil moun pa janm konnen si pwoblem sa ka trete, dèfwa yo pale de blanchiman, yo di tout bagay, men an reyalite tretman pou rezoud pwoblem sa fèt nan  2 faz:

Premye faz la se sa nou rele devitalizasyon an( nan faz sa, dantis la ap fè yon netwayaj an pwofondè nan dan an pou l ka retire Pulpe lan ki gate a ak tout debri Sang ki te kaye nan dan an) yo rele sa Tretmam Andodontik oubyen Tretman kanal.

Nan dezyem faz la, dantis lan ap prepare dan an pou l ka mete yon Kouwòn sou li.
kouwòn nan ap gen egzakteman menm koulè epi menm fòm ak dan nòmal yo, lap pèmèt dan an rejwenn aspè natirèl li menm jan nou wè nan imaj sa.
Kouwòn nan ap pèmèt dan an vin pi stab, mwens frajil e pi rezistan.

An konklizyon, Si nou gen Dan devan nou ki chanje koulè apre nou te fin resevwa yon chòk kèlkonk, li enpòtan pou n kontakte yon dantis pou nou fè tretman kap pèmèt nou rejwenn souri nou.

Si tèks sa te itil ou, pa bliye pataje l ak tout moun sou paj ou.
Siw ta renmen li pwochen tèks la, al abone ak paj @bazard_dentist/prixdent sou lyen sa👇

https://www.facebook.com/docteurbazard/

Swiv nou sou Instagram tou sou lyen sa 👇

https://instagram.com/bazard_dentist?r=nametag

Nimewo WhatsApp Mwen se (509)3128-0400.

Tout saw ta dwe konnen sou braces.

Nou ka remake anpil moun gen sèk nan dan yo kounya,
Èske n ta renmen konn poukisa ?
E Ki enpòtans sèklaj la genyen?
M invité w li tèks sa siw vle gen plis enfòmasyon.

Anpil nan nou toujou ap poze tèt nou kesyon pou mande ki enpòtans enpòtans sèk yo mete nan dan an genyen, dèfwa nou fè anpil  movèz entèpretasyon paske nou manke enfòmasyon.

Banm eksplike nou, sèklaj dantè a se yon pratik nan medsin dantè ke yo rele « Orthodontie », se yon dantis nan peyi lafrans ki te premye fè eksperyans sa nan ane 1728 pou l te ka redrese dan ki pa byen aligné nan bouch pasyan l yo.

Sèklaj la se yon tretman, se pa yon bagay pou plezi jan anpil moun konprann li an. Yo mete sèk pou moun ki gen dan gaye , moun ki gen gwo chenèt ki ta renmen fèmen l, ak moun ki gen dan sou pil ( dan doukla). Yo konn mete sèk tou pou timoun lè machwè yo twò piti pou yo ka pèmèt zo a pi byen devlope.

Èske se tout moun ki ka fè sèklaj?
Non, se pa tout moun ki ka fè sèklaj. Gen moun si yo mete sèk yo ka pèdi tout dan nan bouch yo aprèsa, se sak fè li rekòmande pou gen yon bon kontwòl ki fèt avan yo mete sèk nan dan moun nan.
Youn nan egzanp moun ki paka mete sèk konsa, se Moun ki gen gwo pwoblem nan jansiv ki ka lakoz dan yo souke, moun sa yo dwe sibi gwo tretman pou maladi jansiv avan yo wè si yap kapab mete sèk la pou yo.

Konbyen tan yon moun ta dwe fè ak sèk nan dan l?
Yon tretman sèklaj (traitement orthodontique) kapab dire pou pi piti ant 6 mwa jiska 2zan, men pou moun ki gen ka konplike yo sa kapab dire plis tan toujou.
Youn nan bagay pou nou konprann: plis moun nan fè tretman sa pandan li pi jèn, se plis lap pi fasil pou l jwenn rezilta .

Pou yo fè sèklaj la yo itilize anpil materyèl  ki fet pou sa, ladan yo nou jwenn brakèt , brakèt la se se ti plak yo kole sou dan an ki tou klere a, yo itilize konpozit tou pou yo kole brakèt yo sou dan an, epi gen yon fil ki pase sou tout dan yo,  aprèsa gen elastik yo ki pèmèt fil la tache sou brakèt yo. Elastik yo konn gen plizyè koulè, se elastik yo ki fè fòs sou dan yo pou fè yo chanje plas jiskaske tout dan yo byen ranje nan bouch la.

Anpil moun konn ap mande si sèklaj la pa gen lòt konsekans?
 Sèklaj la se yon tretman, se pou sa yo rele l « traitement orthodontique ». Se yon tretman ki fèt pou moun nan kapab jwenn rezilta, Konsekans nòmal sèklaj la se deplasman dan yo pou moun nan ka jwenn souri li te espere a.
Konsekans grav ki ka gen nan sèklaj se lè moun nan gen foli, li al fè sa kay yon moun ki pa menm gen konpetans pou sa (fo doktè), lè sa elastik yo ka fè twop fòs sou dan yo jiskaske moun nan vin pèdi dan yo. Se pou rezon sa nou dwe byen konnen nan men ki moun nap lage bouch nou. Siw swete amelyore souri w ou vle mete sèk, kontakte dantis ou.

Nou tout ka jwenn souri nou bezwen an depi nou al wè dantis nou, fè dantis nou konfyans epi aplike règ ijyèn yo pou nou toujou kenbe bouch nou an santé.

Si tèks sa te itil ou, pa bliye pataje l ak tout moun sou paj ou.
Siw ta renmen li pwochen tèks la, al abone ak paj @bazard_dentist/prixdent sou lyen sa👇

https://www.facebook.com/docteurbazard/

Swiv nou sou Instagram tou sou lyen sa 👇

https://instagram.com/bazard_dentist?r=nametag